🇭🇰 Гадаад зах зээлийн судалгаа No23

Энэ өдрийн мэнд!

Дэлхийн дотоодын нийт бүтээгдэхүүний 16.9 хувийг бүрдүүлж буй БНХАУ-ын бүтээн байгуулалт, үйлдвэрлэл өндөр түвшинд хүрч тэргүүн байр сууриа бэхжүүлжээ. Гадаад зах зээлийн 23 дугаар дугаарт Li Ning Company Limited нэрээр Хонг Конгийн хөрөнгийн биржид бүртгэгдсэн үндэсний томоохон компанийн судалгааг хүргэж байна. Хувьцааны ханш одоогоор 13.70 HKD-оор үнэлэгдэж буй бөгөөд хөрөнгө оруулагчид доод тал нь 1 лот буюу 500 ширхэг хувьцаа арилжаалах боломжтой.

🧙‍♂️ ЮУ ХИЙДЭГ КОМПАНИ ВЭ ГЭВЭЛ…

Тус компанийг үүсгэн байгуулагч нь өөрөө спортын тамирчин бөгөөд өдгөө спортын гутал, хувцас болон бусад хэрэглэлийн үйлдвэрлэлээр зах зээлийн 10.3 хувийг эзэлж байна. Спортын олон төрөлд зориулсан бүтээгдэхүүн үйлдвэрлэж байгаа ба тус бүрийн брэндийг тусдаа хөгжүүлж буй юм. Борлуулалтаа зөвхөн дотоодын зах зээлд чиглүүлсэн бөгөөд орлогын 99 хувийг БНХАУ-н худалдан авагчид бүрдүүлж байна.

Эерэг талууд

• Компанийн зүгээс нийт гаргасан хувьцааны 3.4 хувийг зах зээл дээрээс буцаан худалдан авсан.

• Нийт өр төлбөрөөс илүү хэмжээний бэлэн мөнгө болон түүнтэй адилтгах хөрөнгөтэй.

• Ногдол ашгийн өгөөж тогтмол өсөлттэй байгаа.

👟 БҮТЭЭГДЭХҮҮН БОЛОН ОРЛОГЫН ЭХ ҮҮСВЭР

Нийт орлого нь 3 сегментээс бүрдэх бөгөөд спорт гуталны борлуулалт дийлэнх хувийг бүрдүүлж байна. 2024 оны хагас жилийн байдлаар нийт борлуулалтын орлого өмнөх оны мөн үеэс 2.3 хувиар өсжээ.

Түүнчлэн нийт ашгийн маржин 50.4 хувьд хүрч өмнөх оны мөн үеэс 1.6 хувиар нэмэгдсэн эерэг үзүүлэлттэй байна. 2021 онд компанийн цэвэр ашиг 2.4 дахин нэмэгдэж хувьцааны ханш 104 HK доллар хүрсэн удаатай.

Мөн санхүүгийн байдлын тайлан дээрх үзүүлэлтүүд “эерэг” үнэлгээг шинжээчдээс аваад байгаа бөгөөд өр төлбөрийн “дарамт” багатай, бараа материалын эргэц буюу лангуу дээрх бэлэн бүтээгдэхүүн хурдан хугацаанд борлуулагдаж байна. 💸

🔥 ТЭДНИЙ ӨРСӨЛДӨГЧИД ХЭН БЭ?

Спорт хувцас болон бусад хэрэгслийн борлуулалтаар Nike БНХАУ-д тэргүүлж буй бол үүний араас Anta, Adidas болон Li ning орж байгаа аж.

Компанийн P/E харьцаа үзүүлэлт өрсөлдөгч нараасаа бага буюу сайн үзүүлэлттэй байгаа бол нөгөө талд борлуулалтын өсөлт удаашралтай харагдаж байна. Одоогийн байдлаар дотоодын спорт бараа үйлдвэрлэгч хамгийн том компани нь Anta байгаа бол үүний араас Li ning жагсаж байгаа юм.

Хятадын эдийн засгийн уналтаас шалтгаалан ханш 2023 оноос хойш унаж 14.30-д хүрсэн бөгөөд энэ нь 2019 оны 6-р сард арилжаалагдаж байсан түвшинд хүрээд байна. Гэсэн хэдий ч 2019 оноос хойш нийт хөрөнгө 3.3 дахин, борлуулалт 2.3 дахин, цэвэр ашиг 2.5 дахин өсжээ.

ТЕХНИК ШИНЖИЛГЭЭ

Техник шинжилгээний хувьд 2018 оноос эхэлсэн тренд шугамыг шалган дэмжлэг аван бага хэмжээний өсөлт үзүүлсэн байгаа бол 2019 онд арилжаалагдаж буй дэмжлэгийн бүс дээр ханш ирсэн байгааг харж байна. Ханш энэхүү бүсээс өсөлт үзүүлвэл 19$ хүртэл өсөх боломжтой. Харин уналт үргэлжлэвэл богино хугацаанд 11$ хүрэхээр харагдаж байна.

🤷 ҮНЭЛГЭЭ БА ЭРСДЭЛ

Нийт 15 үнэлгээний аргаар тооцсон ханшийн дундаж нь 23.87 байгаа тул зах зээл дээр хямдаар үнэлэгдэж байна гэж хэлж болно.

Эрсдэлийн хувьд компанийн борлуулалтын орлого сүүлийн жилүүдэд удааширч байгаа бөгөөд БНХАУ-ын эдийн засаг удааширч, хэрэглэгчдийн худалдан авалт буураад байгаа. Нөгөө талд зах зээлд эзлэх байр суурь бэхэжсэн тогтвортой бизнес хэвээр байгаа бөгөөд олон шинжээчид Hold буюу ажиглах хувьцааны тоонд оруулаад байна.

АНХААРАЛД!!!

Уг и-мэйл нь мэдээллийн шинж чанартай бөгөөд хөрөнгө оруулалтын эцсийн шийдвэрийг харилцагч өөрөө гаргах бөгөөд аливаа хөрөнгө оруулалт нь тодорхой эрсдэлийг өөртөө агуулж байдаг тул алдагдал хүлээх боломжтой.

Дээрх судалгааг бэлтгэхдээ тухайн цаг үеийн хамгийн сүүлийн үеийн мэдээллүүдийг агуулахыг зорьсон бөгөөд гуравдагч талын мэдээллийн үнэн зөв байдалд 100 хувь баталгаа өгч чадахгүй. Хөрөнгө оруулагч тус бүрийн эрсдэлд хандах байдал өөр тул аливаа шийдвэрийг гаргахдаа нэмэлт судалгаа шинжилгээ, зөвлөмж авахыг харилцагч танд санал болгож байна. Энэхүү судалгаанд дурдсан таамаглалаас үүдэн гарах аливаа эрсдэлийг шинжээч болон компани хариуцахгүй болно.