🏢FXI ETF: Хятадын томоохон компаниудад хөрөнгө оруулах гарц

 Шинэ өдрийн мэнд!

Ээлжит гадаад зах зээлийн судалгаагаар биржээр арилжаалагддаг сангийн талаарх мэдээллийг хүргэж байна. Та хэрэгтэй нэгэнд нь www.apex.mn сайтыг санал болгож, цахим шуудангаа бүртгүүлэхийг зөвлөөрэй.

🤔 Та шууд худалдаж авах, зарах боломжтой сангийн талаар сонсож байсан уу?

ETF (Exchange-Traded Fund) буюу "Биржээр арилжаалагддаг сан" нь олон төрлийн хөрөнгө оруулалтын хэрэгслүүдийг нэг дор багтаасан сан бөгөөд хувьцаа, бонд, түүхий эд зэрэг санхүүгийн хөрөнгийг агуулдаг бөгөөд хөрөнгийн бирж дээр арилжаалагддаг онцлогтой.

🇨🇳Тэгвэл Хятадын хамгийн том, өндөр хөрвөх чадвартай компаниудад хөрөнгө оруулах боломжийг олгодог “iShares China Large-Cap ETF”-ийн талаар мэдээллийг хүргэж байна.

Тус ETF-ийг 2004 оны 10-р сард “iShares”-ээс байгуулсан бөгөөд Хонгконг болон Нью Йорк бирж дээр арилжаалдаг.

🦾Түүнчлэн өнгөрсөн 2-р сард БНХАУ-ын дарга Ши Жиньпин “Alibaba”, “Tencent”, “Xiaomi”, “BYD”, “Huawei” зэрэг технологийн салбарын томоохон компанийн удирдлагуудтай уулзалт хийсэн. Энэ нь Хятад Улс хувийн хэвшил, ялангуяа технологийн компаниудад ихээхэн ач холбогдол өгч байгаагийн тод илрэл бөгөөд сүүлийн жилүүдэд тавигдаж байсан хязгаарлалтыг сулруулж, салбарын тэргүүлэгчдэд итгэл хүлээлгэж буйг харуулсан үйл явдал боллоо.

Үүний үр дүнд тус улсын зах зээлд эерэг хүлээлт бий болж, технологийн салбарын өсөлтөд шинэ боломжууд нээгдэх төлөвтэй байна. Мөн энэ уулзалт нь БНХАУ технологийн салбарт АНУ-тай өрсөлдөөнөө эрчимжүүлж буйг илтгэсэн чухал үйл явдал юм.

📈Тэгвэл өнгөрсөн оны 6-р сараас эхлэн БНХАУ-ын хөрөнгийн зах зээл сэргэж эхэлсэнтэй холбоотойгоор сүүлийн нэг жилийн хугацаанд өндөр өсөлт үзүүлээд байна.

📌ETF-д хөрөнгө оруулах нь ямар давуу талтай вэ?

• Ганц хувьцаанд хөрөнгө оруулах эрсдэлийг багасгаж, олон компаниас бүрдсэн багцын давуу талыг ашиглах боломжтой.

• БНХАУ-ын томоохон компаниудын хувьцааг агуулсан тул зах зээлийн эрсдэлээс хамгаална.

• Доорх графикаас үзвэл Хятадын хамгийн өндөр өсөлттэй салбарууд болон тэдгээрт багтаж буй компаниуд руу хөрөнгө оруулалт хамгийн их төвлөрч байгааг харж болно.

🔎 Техник шинжилгээ

👆Тус ETF нь 2024 оны 2-р сараас хойш 70 хувь өссөн бөгөөд энэ нь БНХАУ эдийн засгаа тэлэх зорилгоор удаа дараа хэрэгжүүлсэн бодлоготой шууд холбоотой юм.

Шинжилгээгээр үзэхэд, 2021 оны 1-р сард эхэлсэн уналт 2024 оны 2-р сар хүртэл гурван жил үргэлжилсэн бөгөөд ханш томоохон дэмжлэгийн бүсийг гурав дахь удаагаа шалгаж, 30-32 ам.долларын бүсийн эсэргүүцлийн бүсийг даван гарсан байна. Ойрын хугацаанд ханш 32-35 ам.доллар хооронд хэлбэлзэх магадлалтай боловч энэ бүсээс дэмжлэг авч, урт хугацаанд 51 ам.доллар хүрэх боломжтой.

🚩Техник шинжилгээнээс гадна хөрөнгө оруулагчид дараах хүчин зүйлсийг анхаарах шаардлагатай:

• Макро эдийн засгийн үзүүлэлтүүд – ДНБ-ий өсөлт, инфляци, ажилгүйдлийн түвшин

• Засгийн газрын бодлого – Татварын зохицуулалт, хөрөнгө оруулалтын урамшуулал

• Гадаад худалдааны нөхцөл байдал – АНУ-Хятадын худалдааны бодлого

• Зах зээлийн ерөнхий чиг хандлага – Хөрөнгө оруулагчдын итгэл, зах зээлийн савлагаа

📑Хэрэв та манай шинжээчдийн бэлтгэсэн дараагийн судалгааг хүлээн авах болон биржээр арилжаалагддаг сан /ETF/-ийн талаар сонирхож байгаа бол бидэнтэй холбогдож, дэлгэрэнгүй мэдээлэл аваарай.

💰Бондын зах зээлийн мэдээ

Олон улсын зах зээлд нээлттэй арилжаалагддаг Монгол бондуудын ханш тэр дундаа Засгийн газрын бондуудын таван өдрийн дундаж ханш 0.27-1.70 хувь болж буурсан бол компанийн бондуудын ханш 0.25-0.93 хувиар буурсан үзүүлэлттэй байна.

📣Өнгөрсөн пүрэв гарагт буюу 3-р сарын 27-ны өдөр Mongolian Mining Corporation /MMC/-аас таван жилийн хугацаатай, нийт 350 сая ам.долларын бондыг шинээр гаргахаа зарлалаа. 

Бондын нөхцөл

• Купон: 8.44 хувь

• Үнэ: 98.766 ам.доллар

• Өгөөж: 8.75 хувь

• Багцын хэмжээ: 200 мянган ам.доллар

• Эхлэх хугацаа: 2025 оны 4-р сарын 3 өдөр (T+5)

• Дуусах хугацаа: 2030 оны 4-р сарын 3 өдөр

• Заавал эргэн төлөгдөх нөхцөл: Хэрэв Ухаа Худагийн лиценз цуцлагдвал бонд гаргагч нь 30 хоногийн өмнө бонд эзэмшигчдэд мэдээлэл хүргүүлж 30 хоногоос багагүй, 60 хоногоос ихгүй хугацаанд бондын ханшийг 102 хувиар бодож, хуримтлагдсан болон төлөгдөөгүй хүүгийн хамт эргүүлэн төлнө.

Монгол улсын Засгийн газрын бондуудын өгөөж 5.94-7.38 хувь хооронд хэлбэлзэж байгаа бол компанийн ам.долларын бондуудын өгөөж 5.78-11.02 хувь хооронд хэлбэлзэж байна. Монгол бондууд дундаас хамгийн өндөр өгөөжтэй нь “МИК” компанийн “Хулан” бонд, 11.02 хувийн өгөөжтэй байна.