🇨🇳 Хятадын эдийн засаг

1978 онд Хятад улс эдийн засгаа шинэчлэн, олон улсад нээснээр тэдний ДНБ жил бүр дунджаар 9% өссөөр өнөөдөр дэлхийн 2 дахь хамгийн том эдийн засагтай улс болоод байна. 2011 онд $7.5 их наяд байсан Хятадын ДНБ 2023 оны байдлаар $17.52 их наяд хүрч 2.3 дахин нэмэгджээ.

🛢Түүхий эдийн салбар. Газар тариалан, загас агнуур, газрын тос олборлолт гэх мэт түүхий эдийг олборлох үйл ажиллагаа үүнд багтана. Энэхүү салбар нь Хятадын ДНБ-ны 10%-ийг бүрдүүлдэг ба дэлхийн нийт хүнсний 20% үйлдвэрлэдэг байна.

🏭Аж үйлдвэрлэлийн салбар. Бүх төрлийн үйлдвэрлэл энэхүү салбарт багтах ба ДНБ-ны 40.5%-ийг бүрдүүлдэг ба ажиллах хүчний 30%-ийг эзэлдэг.

👨🏻‍💻Үйлчилгээний салбар. Бүх төрлийн үйлчилгээ үүнд хамаарах ба ДНБ-ны 50.5%, ажиллах хүчний 40%-ийг эзэлдэг байна.

Салбаруудын өсөлт 2023 онд:

• Үйлчилгээ - 5.8%

• Үйлдвэрлэл - 4.7%

• Түхий эд олборлолт - 4.1%

Үйлчилгээний салбар хамгийн их өсөлттэй байсан ба энэ нь 2023 онд цар тахлын хөл хорио бууснаас шууд хамааралтай байна. Цар тахал буурснаар үзвэр үйлчилгээ, аялал жуулчлал, катеринг зэрэг 2020 онд уналттай байсан секторууд бүгд сэргэсэн. Хамгийн их өсөлттэй сектор:

• Катеринг болон буудлын үйлчилгээ 14.5%

• Мэдээлэл технологийн үйлчилгээ 11.9%

• Лизинг болон бизнесийн үйлчилгээ 9.3%

• Тээвэр, агуулах, шуудангийн үйлчилгээ 8% тус тус өссөн байна.

📈 Жижиглэн худалдаа ба инфляц

Нийт жижиглэн худалдаа $6.6 их наяд хүрч 2022 оноос 7.2%-иар өссөн. Жижиглэн худалдаа нь хэрэглэгчдийн эрэлт, тухайн эдийн засгийн эрүүл мэнд болон инфляцыг төлөв байдлыг илэрхийлэгч макро эдийн засгийн гол үзүүлэлтийн нэг.

Хэдийгээр жижиглэн худалдаа хүчтэй байгаа ч Хятадын инфляц 2023 онд ердөө 0.2%-иар өссөн байна. Хятадын хэрэглээний сагсанд жин их эзэлдэг гахайн махны үнэ 2023 онд 13.6% буурсан нь нөлөөлжээ.

📉 Олон улсын худалдаа

2023 оны 1-р улиралд Хятадын олон улсын худалдаа сэргэж өмнөх оны мөн үеэс 4.8% өссөн ч оны сүүлээр буурч ердөө 0.2%-ийн өсөлт үзүүлсэн байна.

Экспорт - $3.3 их наяд
Импорт - $2.5 их наяд

2024 ОНЫ ЭХЛЭЛ САЙН ТАВИГДСАН Ч ГОЛ АЧААГ ТЕХНОЛОГИЙН САЛБАР ҮҮРЧ БАЙНА

Энэ оны эхний улиралд ДНБ өмнөх оны мөн үеэс 5.3 хувиар өссөн тухай энэ Мягмар гарагт ҮСХ-оос мэдэгджээ. Ингэснээр олон шинжээчдийн таамаг болох 4.6 хувийг давсан юм.

Технологийн бүтээгдэхүүний үйлдвэрлэл үүнд голчлон нөлөөлсөн бөгөөд 3D хэвлэх төхөөрөмж, цахилгаан машин цэнэглэх зогсоол зэргийн үйлдвэрлэл 40 хувиар өсжээ. Түүнчлэн PMI индекс сүүлийн хагас жилд анх удаа өсөлттэй гарсан.

*PMI индекс нь үйлдвэрлэлийн салбар дах чиг хандлагыг илтгэдэг бөгөөд түүхий эдийн худалдан авалт, түгээлт зэрэг үйлдвэрлэлийн хүчин зүйлүүдийг хамруулан авч үздэг.

Нөгөө талд ХАА, барилгын салбарын сэргэлт муу байгаа нь нийт эдийн засгийн өсөлтийн суурь тогтворгүй байгааг харуулж байна. Түүнчлэн гадаадын хөрөнгө оруулалт 0.5% нэмэгджээ.

Hang Seng Index

Хятадын ихэнх хувьцаат компаниуд бүртгэлтэй байдаг Hang Seng Index сүүлийн 1 жилд 19.55%-иар буураад байна. Эдийн засгийн сэргэлт шинжээчдийн таамгаас хүчтэй байгаа ч худалдааны дайн,
үл хөдлөх хөрөнгийн хямрал болон бусад хүчин зүйлсээс шалтгаалж хувьцаат компаниудын ханш бууралттай байна.

Ингэснээр Hang Seng Index-ийн P/E ratio харьцаа 9.3 болж буурсан нь хятадын хөрөнгийн зах зээл хямдаар үнэлэгдэж буйн том жишээ.

Бусад орны индексийн P/E харьцаа:

• Япон - Nikkei 225 Index - 21.55

• Герман - Dax Index - 18.6

• АНУ - S&P 500 Index - 27.26

DISCLAIMER ! ! !

Уг и-мэйл нь мэдээллийн шинж чанартай бөгөөд хөрөнгө оруулалтын эцсийн шийдвэрийг харилцагч өөрөө гаргах бөгөөд аливаа хөрөнгө оруулалт нь тодорхой эрсдэлийг өөртөө агуулж байдаг тул алдагдал хүлээх боломжтой.

Дээрх судалгааг бэлтгэхдээ тухайн цаг үеийн хамгийн сүүлийн үеийн мэдээллүүдийг агуулахыг зорьсон бөгөөд гуравдагч талын мэдээллийн үнэн зөв байдалд 100 хувь баталгаа өгч чадахгүй. Хөрөнгө оруулагч тус бүрийн эрсдэлд хандах байдал өөр тул аливаа шийдвэрийг гаргахдаа нэмэлт судалгаа шинжилгээ, зөвлөмж авахыг харилцагч танд санал болгож байна.