🇲🇳 Хөрөнгийн зах зээлийн эргэн тойронд No41

Шинэ өдрийн мэнд,

📥 Апекс Капиталын зүгээс харилцагч танд өнгөрсөн 7 хоногт болж өнгөрсөн онцлох үйл явдал болон энэ 7 хоногт анхаарах зүйлсийн талаар багцлан хүргэж байна.

🔍 ДУГААРЫН ЭМХЭТГЭЛ

🤳 Инновэйши Инвэстмэнт ХК-ны цэвэр ашиг 2.2 дахин өсжээ

🏦 МХБ-д бүртгэлтэй ББСБ-уудын нийт хөрөнгө өмнөх оны мөн үеэс дунджаар 62 хувь нэмэгджээ.

💳️ ХХБ эхний хагас жилд ₮174.1 тэрбумын ашигтай.

ЭХНИЙХ НЬ

🤳 Инновэйши Инвэстмэнт ХК-ны цэвэр ашиг 2.2 дахин өсжээ

📱Инновэйши Инвэстмэнт ХК нь 2017 онд үүсгэн байгуулагдсан ба өдгөө “ККТТ” ХХК, “Дижитал мерчант сервисес” ХХК гэх 2 охин компанитайгаар үйл ажиллагаа явуулж байна. Дараах 4 зүйлсийг 2024 оны хагас жилийн онцлох үйл явдал хэмээв:

• GLN QPay хамтын ажиллагаа БНСУ-н цахим төлбөр тооцооны систем болох GLN International-тай хамтран тус улсын иргэд Монгол улсад QPay QR кодыг уншуулан төлбөр тооцоогоо хийх боломжийг бүрдүүлсэн.

• WeChatPay төлбөрийн систем 2024 онд Монгол улсын иргэн Гадаадын Иргэн Харьяатын Газарын цахим үйлчилгээнд системийн холболт хийж цахим виз, оршин суух эрх зэрэг үйлчилгээний төлбөрийг цахим болгож шийдсэн.

• BPay үйлчилгээг нэвтрүүлэв Төрийн банктай хамтран иргэдийн хэрэглээний төлбөр тооцоог хариуцдаг байгууллагуудын системийг нэгтгэн хэрэглэгч өөрийн финтек аппликейшнууд болон банкны аппликейшнаараа хэрэглээний төлбөрөө төлөх боломжийг хангасан.

• Easy invoice систем Цахим орчинд худалдаа хийж буй иргэдэд зориулан өөрийн төлбөрийн дүнгээр төлбөрөө төлөх боломжийг бий болгосон.

Компанийн орлого ₮18 тэрбум хүрч өмнөх оны мөн үеэс 102%, цэвэр ашиг ₮5.28 тэрбум буюу 124%-иар өссөн байна. Нийт үйлчилгээний байгууллагуудтай системийн холболт хийсэнтэй холбоотой нийт гүйлгээний үд дүн нэмэгдэж энэхүү өсөлтийг бий болгосон байна.

УРЬДЧИЛСАН ГҮЙЦЭТГЭЛЭЭР

Mөнгөний нийлүүлэлт (M2) 2024 оны 7-р сарын урьдчилсан гүйцэтгэлээр ₮41.8 их наядад хүрч өмнөх оны мөн үеэс 30.6% өссөн байна.

Татварын нийт орлого, ₮15.8 их наядад хүрч өнгөрсөн оны мөн үеэс 36.2% нэмэгджээ. Орлогын албан татвар 70.3% өсөж, ₮2.3 их наядад хүрсэн нь чухал нөлөө үзүүлсэн байна.

Чанаргүй зээлийн өрийн үлдэгдэл өнгөрсөн сарын эцэст ₮2 их наяд болж, 2023 оны мөн үеэс 12% буурчээ.

ББСБ САЛБАР

🏦 МХБ-д бүртгэлтэй ББСБ-уудын нийт хөрөнгө өмнөх оны мөн үеэс дунджаар 62 хувь нэмэгджээ.

Санхүүгийн салбарт чухал байр суурь эзэлдэг ББСБ-уудын тоо 500 гаруй байдаг бөгөөд ердөө 5 нь хувьцаагаа олон нийтэд санал болгосон билээ. Өмнөх оны хагас жилтэй харьцуулахад ЛэндМН компанийн нийт хөрөнгө 114% нэмэгдсэн байгаа бол 5 компанийн дундаж өсөлт 62% байна. Түүнчлэн зээлийн багцын дундаж өсөлт 44%, эздийн өмчийн дундаж өсөлт 54% тус тус гарчээ.

Компани тус бүрт санхүүгийн өсөлт ажиглагдаж байгаа нь ББСБ-ын салбарын эрэлт хэрэгцээ өндөр байгааг харуулж байна. Түүнчлэн салбарын хэвийн зээл 90.8%, чанаргүй зээл 6.2% байгаа үзүүлэлтийг СЗХ-ны зүгээс тайландаа дурджээ.

ХХБ эхний хагас жилд ₮174.1 тэрбумын ашигтай.

Компани 2024 оны эхний хагас жилийн онцлох үйл явдлыг товчхон танилцуулбал:

• Бритто” экосистемийг амжилттай цогцлоож, “Хуримтлалтай Монгол” аяныг илүү өргөн хүрээнд хэрэгжүүлж байна. VISA картын зах зээлд эзлэх хувь 2021 онд 13.9% байсан бол 2024 оны I улиралд 29.2% болж нэмэгдлээ. Мөн тайлант хугацаанд “Хуримтлалтай Монгол” аянд шинээр хамрагдсан харилцагчдын тоо өмнөх жилийн мөн үетэйгээ харьцуулахад 49%-р өссөн байна.

• Тайлант хугацаанд гадаад төлбөр тооцооны зах зээлд эзлэх хувь 42.1%-д хүрч, 2023 оны эцэстэй харьцуулахад даруй 3 нэгж хувиар нэмэгдлээ.

• CU болон GS 25 сүлжээ дэлгүүрүүдтэй хамтран тэдгээрийн 700 гаруй сүлжээ дэлгүүрээс карт захиалах боломжийг нээлээ.

• Суурь бүртгэлийн “Temenos Transact 24” систем, Дижитал банкны “Temenos Infinity” платформ шийдлүүдийг амжилттай нэвтрүүлж байна.

Санхүүгийн голлох үзүүлэлт:

Банкны ашигт ажиллагаа нэмэгдэж байгаатай холбоотой активын өгөөж (ROA) 2.9%, өөрийн хөрөнгийн өгөөж (ROE) 25.9%-тай тус тус гарлаа. Энэ нь 2023 оны эцэстэй харьцуулахад 1.7 болон 15.2 нэгж хувиар өссөн үзүүлэлт болж байна.

🫡 “АШГАА АРВИЖУУЛ АРД БОНД” ЗАХИАЛГАА АВЧ БАЙНА.

Салбарын хөгжлийг түүчээлэгч, алсын хараа бүхий Ард Кредит ББСБ ХК нь Апекс Капитал ҮЦК ХХК-аар дамжуулан Улаанбаатар Үнэт Цаасны бирж дээр нээлттэй бонд гаргаж байна. 2019 онд IPO хийсэн цагаас хойш МХБ-ийн Топ-20 индексэд багтаж буй уг компани нь “Ард Санхүүгийн Нэгдэл”-ийн хамгийн чухал бүрэлдэхүүн билээ.

БОНДЫН ОНЦЛОГ:

• Хүүгийн орлогын татвар, 5% буюу бусад хөрөнгө оруулалтын хүүгийн татвараас 2 дахин бага.

• Хөрвөх чадвар, Бирж дээр шууд арилжаалагдах тул хүссэн үедээ авч зарах захиалга өгөх боломжтой.

• Барьцаа хөрөнгө, МХБ-ийн I ангилалд нээлттэй арилжаалагдаж буй Ард Санхүүгийн Нэгдэл ХК, Ард Кредит ББСБ ХК-ийн ₮19.3 тэрбумын үнэлгээ бүхий хувьцааг барьцаалан гаргаж байгаа.