🇲🇳 Хөрөнгийн зах зээлийн эргэн тойронд №40

Шинэ өдрийн мэнд,

📥 Апекс Капиталын зүгээс харилцагч танд өнгөрсөн 7 хоногт болж өнгөрсөн онцлох үйл явдал болон энэ 7 хоногт анхаарах зүйлсийн талаар багцлан хүргэж байна.

🔍 ДУГААРЫН ЭМХЭТГЭЛ

🇲🇳 Манай улсын эдийн засаг, 2024 оны хагас жилийн байдлаар.

🏦 Хасбанк 2024 оны хагас жилд, ₮85.3 тэрбумын ашигтай.

🌎️ Гадаад худалдааны тэнцэл, 2.9 тэрбум ам.долларын ашигтай.

🥛 СҮҮ ХК, ₮96 тэрбумын борлуулалт хийв.

🛒 Инфляц, 7-р сард

ЭХЛЭЛ

🇲🇳 Манай улсын эдийн засаг, 2024 оны хагас жилийн байдлаар

2019 оноос хойш алдагдалтай байсан төсвийн тэнцэл өнгөрсөн оны эхэн үеэс сайжирч, төсвийн орлого зардлаа нөхөж эхэлсэн байна. Энэ нь ААН-үүдийн үйл ажиллагаа тогтвортой байж татварын орлого нэмэгдсэн, нөгөө талдаа уул уурхайн экспортын нөхцөл байдал эерэг байгаатай холбоотой байна. 

Түүнчлэн эдийн засагт эргэлдэж буй M1, M2 мөнгөний нийлүүлэлт өмнөх оны мөн үетэй харьцуулахад өндөр хувиар нэмэгдсэн байгаа дүр зурагтай байна.

Мөнгөний нийлүүлэлт (М2) энэ оны 6 дугаар сарын эцэст урьдчилсан гүйцэтгэлээр ₮41.4 их наяд болжээ. Үүнийг өмнөх оны мөн үетэй харьцуулахад ₮10.0 их наядаар буюу 31.7%-иар өссөн үзүүлэлттэй байна. Үүнд:

• Төгрөгийн хадгаламж 5.2 их наяд төгрөгөөр буюу 36.2 хувиар,

• Төгрөгийн харилцах 3.3 их наяд төгрөгөөр буюу 44.3 хувиар өссөн голлон нөлөөлжээ.

ҮҮНИЙ ДАРААГААР

🏦 Хасбанк 2024 оны хагас жилд, ₮85.3 тэрбумын ашигтай.

2024 оны 2-р улирлын байдлаар Хас банкны цэвэр ашиг ₮85.3 тэрбумд хүрч, өмнөх оны мөн үеэс 38.3%-иар нэмэгджээ. Мөн үүнээс гадна:

• Зээл ба санхүүгийн түрээсийн багц оны эхнээс 20.8% өсөж ₮3.3 их наядад хүрсэн.

• Нийт зээл ба санхүүгийн түрээсэнд эзлэх чанаргүй зээлийн хувь 2.2%-д удирдан ажиллаж байна.

• Харилцах, хадгаламжийн эх үүсвэр оны эхнээс 11.3%-р өсөж ₮3.2 их наядад хүрсэн байна. 

• Олон улсын банк, санхүүгийн байгууллагуудаас нийт 104.3 сая ам.долларын урт хугацаат эх үүсвэр шинээр татан төвлөрүүлж, жижиг дунд бизнесийг тэр дундаа эмэгтэй бизнес эрхлэгчдийг дэмжих, эрчим хүчний хэмнэлттэй үйл ажиллагаа болон хэрэглээг санхүүжүүлэхэд зориулахаар ажиллаж байна. 

🌎️ Гадаад худалдааны тэнцэл, 2.9 тэрбум ам.долларын ашигтай

Гадаад худалдааны нийт бараа эргэлт 15.7 тэрбум ам.доллар болж өмнөх оны мөн үеэс 14.2%-иар өсжээ.

Экспорт, 9.3 тэрбумын бараа бүтээгдэхүүн болон түүхий эд гаргасан ба энэ нь өмнөх оны мөн үеэс 6.5% өссөн үзүүлэлт

Импорт, Импортын бараа бүтээгдэхүүн 6.4 тэрбум ам.доллар болж өмнөх оны мөн үеэс 27.6% өсөөд байна. Ийнхүү экспортын хэмжээ импортоос 2.9 тэрбум ам.доллароор давж, гадаад худалдааны тэнцэл ашигтай гараад байна.

🛒 Инфляц, 7-р сард

Хэрэглээний бараа, үйлчилгээний үнэ 7-р сард улсын хэмжээнд өмнөх оны мөн үеэс 5.5%-иар, өмнөх оны эцсээс 4.4%-иар, өмнөх сараас 0.4%-иар өссөнийг Үндэсний статистикийн хороо мэдэгдлээ.

Инфляц 5.5 хувьтай гарахад 1.7 нэгж буюу 30.6 хувь нь хүнсний бараа, ундаа, усны бүлгийн үнийн өсөлтөөс шалтгаалжээ.

ЭЦЭСТ НЬ

🥛 СҮҮ ХК, ₮96 тэрбумын борлуулалт хийв.

Манай улсын ууган үйлдвэрүүдийн нэг Сүү ХК 1958 онд үүсгэн байгуулагдаж байсан бөгөөд тухайн үедээ өдөрт 30 тонн сүү боловсруулах хүчин чадалтай байжээ. Тэгвэл өдгөө 130-200 тонн сүү, сүүн бүтээгдэхүүн боловсруулах хүчин чадалтай, 70 гаруй нэр төрлийн бүтээгдэхүүнийг зах зээлд нийлүүлж байна.

Компани 2023 онд нийт ₮147.7 тэрбумын борлуулалт гүйцэтгэж байсан бол энэ оны хагас жилээр гэхэд тус үзүүлэлт ₮95.9-д хүрсэн байна.  Түүнчлэн борлуулсан бүтээгдэхүүний өртөг 1 хувиар буурчээ. Оны эхний хагаст ₮12 тэрбумын цэвэр ашигтай ажилласан нь 2023 оны үетэй буюу нэг жилийн гүйцэтгэлтэй дөхсөн ашигтай гарчээ.

🎉 “АШГАА АРВИЖУУЛ АРД БОНД” ЗАХИАЛГАА АВЧ ЭХЭЛЛЭЭ.

Салбарын хөгжлийг түүчээлэгч, алсын хараа бүхий Ард Кредит ББСБ ХК нь Апекс Капитал ҮЦК ХХК-аар дамжуулан Улаанбаатар Үнэт Цаасны бирж дээр нээлттэй бонд гаргаж байна. 2019 онд IPO хийсэн цагаас хойш МХБ-ийн Топ-20 индексэд багтаж буй уг компани нь “Ард Санхүүгийн Нэгдэл”-ийн хамгийн чухал бүрэлдэхүүн билээ.

БОНДЫН ОНЦЛОГ:

• Хүүгийн орлогын татвар, 5% буюу бусад хөрөнгө оруулалтын хүүгийн татвараас 2 дахин бага.

• Хөрвөх чадвар, Бирж дээр шууд арилжаалагдах тул хүссэн үедээ авч зарах захиалга өгөх боломжтой.

• Барьцаа хөрөнгө, МХБ-ийн I ангилалд нээлттэй арилжаалагдаж буй Ард Санхүүгийн Нэгдэл ХК, Ард Кредит ББСБ ХК-ийн ₮19.3 тэрбумын үнэлгээ бүхий хувьцааг барьцаалан гаргаж байгаа.