🇭🇰 Гадаад зах зээлийн судалгаа №21

Энэ өдрийн мэнд!

Технологийн хөгжлөөр түүчээлэх тэмцээнд БНХАУ тэргүүлж буй бөгөөд хөрөнгө оруулагчдын хувьд ажиглаж байх ёстой салбарын нэг юм. Энэхүү дугаарт ухаалаг гар утасны нийлүүлэлтээр дэлхийд 3-т бичигдэж буй, саяхан цахилгаан автомашины зах зээлд хөл тавьсан Xiaomi компанийн судалгааг хүргэж байна.

🦄КОМПАНИЙГ ТОЙМЛОХ НЬ

Тус компани нь ухаалаг гар утас болон гэр ахуй, интернэт сүлжээ гэсэн бүтээгдэхүүн үйлчилгээг зах зээлд нийлүүлдэг бөгөөд борлуулалтын 50-аас дээш хувийг гар утас бүрдүүлдэг. 2010 онд үүсгэн байгуулагдсан ч гэсэн ухаалаг утас нийлүүлэлтээр Samsung, Apple нарын араас орж байна.

Технологийн бусад компаниудаас ялгарах давуу тал нь үнийн хувьд хүртээмжтэй, үйлдлийн систем нь олон боломжуудыг агуулсан байх бөгөөд гар утас, ухаалаг утас болон бусад электрон төхөөрөмжүүдийн холбоотой ажиллах функцүүд юм. Компанийн үнэлгээ 421 тэрбум Хонг Конг доллар буюу МУ-ын дотоодын нийт бүтээгдэхүүнээс даруй 2.6 дахин өндөр байна.

🪄ҮЙЛДВЭРЛЭЖ ЧАДАХГҮЙ ЮМ АЛГА

Ухаалаг утасны нийлүүлэлтээр дэлхийд 3-т буюу нийт зах зээлийн 13.8 хувийг бүрдүүлж байгаа тухай 2024 оны нэгдүгээр улиралд компанийн зүгээс мэдэгдэл гаргасан. Энэ нь YoY буюу өмнөх оны мөн үеэс 2.4 хувиар өссөн дүн юм.

Сүүлийн 1 жилд ухаалаг утасны нийлүүлэлт 33.3 хувиар нэмэгдэж 40.7 сая ширхэг утас борлуулсан. Мөн сүүлийн 3 улирал дарааллан борлуулалтын тоо нэмэгджээ.

Түүнчлэн ухаалаг төхөөрөмж буюу таблет, зурагт болон чихэвчний борлуулалт 27.2 хувиар өссөн байна. Энэ оноос эхлэн цахилгаан автомашины нийлүүлэлтийг хийж эхлэснээр цорын ганц ухаалаг утас, цахилгаан автомашин үйлдвэрлэгч болсон юм. Ингээд Xiaomi брендийн утас, гэр ахуйн цахилгаан бараа болон EV нар бүгд хоорондоо холбоотой ажиллах нь ээ 🤝🏻

SU7 загварын цахилгаан автомашин нь 2024 оны 3 сарын 28-нд танилцуулагдаж тухайн өдөртөө 88,063 захиалгыг авсан аж. БНХАУ-ын хувьд цахилгаан автомашины зах зээлд хоосон зай бага, шинээр нэвтрэхэд хэцүү боловч аль хэдийн бий болгосон эко систем, нэр хүндийн ачаар эхний 8 байрт багтаж байна. Компанийн шинэ бизнес одоогоор алдагдалтай байгаа аж. Тус загварын хувьд зах зээлд Tesla компанийн машинуудаас 4 мянга орчим ам.доллараар хямд санал болгогдож байна.

ЭРҮҮЛ САНХҮҮГИЙН ӨСӨЛТ

Нийт хөрөнгийн 48 хувь нь өр төлбөр бөгөөд үлдсэн хувь нь эздийн өмч байгаа юм. Өр төлбөрийн дийлэх хувь нь богино хугацаат өр буюу өглөг байна.

Борлуулалтын орлого сүүлийн 5 улирал дарааллан өсөж байгаа нь онцлох үзүүлэлт юм.

👏Компанийн хувьд бүтээгдэхүүний өртгийг бууруулахад анхаарч нийт ашгийн маржин сегмент бүр дээр өсжээ.

🤷ҮНЭЛГЭЭ БА ЭРСДЭЛ

Компанийн хувьцаа ХонгКонгын хөрөнгийн биржид бүртгэлтэй бөгөөд одоогоор 17.26 HKD ханштай байна. Нийт 15 үнэлгээний аргаар тооцсон ханшийн дундаж нь 22.45 байгаа тул зах зээл дээр хямдаар үнэлэгдэж байна гэж хэлж болно.

Эрсдэлийн хувьд компанийн шинээр нэвтэрч буй зах зээл болох цахилгаан автомашинд АНУ хориг тавьсан байгаа. Гэвч Xiaomi компанийн зорилтот зах зээл нь АНУ биш тул тийм ч өндөр сөрөг нөлөөтэй биш гэж хэлж болно. Одоогоор дөнгөж эхлэж буй тус бизнес нь дотоодын зах зээлдээ ямар амжилт олох нь хамгийн чухал сэдэв болоод байна.
Цахилгаан машин зах зээлд анх гарч, захиалга их байсан үе буюу энэ оны 5 сард компанийн хувьцааны ханш өндөр өсөлтийг үзүүлсэн.

🎯ЭЦЭСТ НЬ

АНХААРАЛД!!!

Уг и-мэйл нь мэдээллийн шинж чанартай бөгөөд хөрөнгө оруулалтын эцсийн шийдвэрийг харилцагч өөрөө гаргах бөгөөд аливаа хөрөнгө оруулалт нь тодорхой эрсдэлийг өөртөө агуулж байдаг тул алдагдал хүлээх боломжтой.

Дээрх судалгааг бэлтгэхдээ тухайн цаг үеийн хамгийн сүүлийн үеийн мэдээллүүдийг агуулахыг зорьсон бөгөөд гуравдагч талын мэдээллийн үнэн зөв байдалд 100 хувь баталгаа өгч чадахгүй. Хөрөнгө оруулагч тус бүрийн эрсдэлд хандах байдал өөр тул аливаа шийдвэрийг гаргахдаа нэмэлт судалгаа шинжилгээ, зөвлөмж авахыг харилцагч танд санал болгож байна. Энэхүү судалгаанд дурдсан таамаглалаас үүдэн гарах аливаа эрсдэлийг шинжээч болон компани хариуцахгүй болно.