✈️Хүннү эйр компани 2025 онд өөрийн хоёр дахь агаарын хөлгийг хүлээн авна

Харилцагч танд энэ өдрийн мэнд хүргэе,

📥 “Апекс Капитал ҮЦК”-ийн зүгээс бонд эзэмшигч харилцагч нарын хөрөнгө оруулсан компанийн мэдээ мэдээллийг цаг алдалгүй хүргэхийг зорин ажилладаг билээ. Энэ удаад бид Хүннү Эйр компанийн 2024 оны эхний хагас жилд хэрхэн ажилласан мөн ирээдүйн үйл ажиллагааны төлөвлөгөөний талаар бэлтгэн хүргэж байна. 

Хүннү Эйр компани 2024 оны эхний хагаст ₮54.3 тэрбумын борлуулалт хийсэн нь өмнөх оны мөн үетэй харьцуулахад 61.1 хувиар өссөн дүн юм. Түүнчлэн 2023 оны эхний хагаст 897 сая төгрөгийн алдагдалтай ажиллаж байсан бол 2024 оны эхний хагас жилийн хувьд 250 сая төгрөгийн ашигтай ажиллаж чадсан байна.

2023 оноос эхлэн орлогын үзүүлэлт зардлаас өндөр гарч эргэн ашигтай ажиллаж эхэлсэн бөгөөд ковидын өмнөх буюу 2019 оны үзүүлэлт дээр ирсэн. Энэ нь компанийг ковидын үеийн хүндрэлийг амжилттай дамж эргэн ашигт ажиллагаанд орсныг харуулж буй юм. Түүнчлэн 2024 оны хувьд орлого зардлын харьцааг 1.10 байхаар урьдчилсан төсөөлөл гарган ажиллаж байна.

Хүннү Эйр компани нь одоогоор ОХУ, Казакстан, Киргизстан, БНХАУ, Япон, БНСУ-ын хотууд руу 7 хоног бүр тогтмол нислэг үйлддэг.

Хүннү Эйр компани 2024 оны эхний хагас жил Е190 агаарын хөлгөөр 25 чиглэлд 526 удаагийн нислэг үйлдэж 80,4 мянган зорчигч тээвэрлэсэн үзүүлэлттэй гарсан байна.

2024 оны төлөвлөгөөнөөс гадна нэмэлтээр:  

• Олон улс: ОХУ-Иркутск, Япон-Осака, Кыргызстан-Иссакул, Бишкек, Энэтхэг-Армицарь хотууд,

• Орон нутаг:  Ховд, Өлгий чиглэлд тус тус захиалгат нислэг үйлдсэн.

Хүннү Эйр компани 2024 оны эхний хагас жилийн байдлаар дараах 2 томоохон хэлцлүүдийг хийгээд байна.

Одоо ашиглаж буй JU8811 бүртгэлийн дугаартай Е190 агаарын хөлгийн түрээсийн хугацаа 2025 оны 5 дугаар сард дуусгавар болж байгаа ба хугацаа дуусгавар болмогц тус агаарын хөлгийг худалдан авахаар гэрээ, хэлцэл хийж баталгаажуулсан. Ингэснээр өөрийн эзэмшлийн 2 агаарын хөлөгтэй болох юм.

Мөн 2025 оны 3 болон 10 дугаар саруудад  Brand new Е195-2 маягийн агаарын хөлгийг түрээсэлж гэрээний хугацааны эцэст худалдан авах гэрээг хийж баталгаажуулсан. Тус агаарын хөлөг нь одоо ашиглагдаж байгаа ижил төрлийн агаарын хөлгүүдээс түлшний зарцуулалт даруй 20 орчим хувиар, нэгж суудлын зардал 14 хувиар бага байдаг. Одоо бидний ашиглаж байгаа агаарын хөлөгтэй ижил маягийн агаарын хөлөг учир сэлбэгийн нөөц бүрдүүлэх зардал бага боловсон хүчин бэлэн байгаа гэх мэт давуу талуудтай. Тус агаарын хөлгөөр хуваарьт болон захиалгат нислэгүүдийг үйлдэж үйл ажиллагаагаа өргөжүүлэхээр ажиллаж байна.

АПЕКС КАПИТАЛ ҮЦК

Компанийн өрийн хэрэгсэл нь мэргэжлийн Андеррайтерийн компаниар дамжин хөрөнгө оруулагчдад санал болгогдох бөгөөд үүнд 2-3 сарын судалгаа, дүгнэлт шаардлагатай. Түүнчлэн эрх бүхий этгээдийн зөвшөөрлөөр үнэт цаас нь хүчин төгөлдөр болж байдаг зохицуулалттай. Андеррайтерийн Апекс капитал ҮЦК-ийн зүгээс хөрөнгө оруулагчдад тогтмол мэдээлэл хүргэх зорилгоор төсөл, хөтөлбөр болон бондын зарцуулалтын мэдээг ийнхүү хүргэж байна.