🇲🇳 🤝🏻 🇨🇦 Эрдэнэ ресурс девелопмент ХК

Эрдэнэ ресурс девелопмент ХК (Erdene Resource Development Corporation) нь МХБ(2021) болон Торонтогийн хөрөнгийн бирж (2004) дээр давхар бүртгэлтэй, уул уурхайн хайгуулын чиглэлээр үйл ажиллагаа эрхэлдэг, Канад улсад төвтэй компани.

Үйл ажиллагаа: Монгол Улсад суурь болон үнэт металлын хайгуул, тѳсѳл хѳгжүүлэлтийн үйл ажиллагааг Баянхонгор аймагт эрхэлдэг бөгөөд ашиглалтын 3 лиценз(mining license), 1 хайгуулын тусгай зөвшөөрөл эзэмшдэг байна.

Ашигт малтмалын хайгуул, ашиглалтын тусгай зѳвшѳѳрлийг Компанийн охин компаниуд болох Эрдэнэ Монгол ХХК, Аниан Ресорсиз ХХК, Лидер Эксплорэйшн ХХК эзэмшдэг.

Алтны төслүүд - Баян Хөндий, Алтан нар, Улаан, Хар Морь
Зэсийн төслүүд - Зуун мод, Хөвийн хар

Баянхөндий төсөл нь дэлхийн хэмжээнд хамгийн өндөр агуулгатай, ил аргаар олборлох боломжтой уурхайн нэг бөгөөд олборлолтыг эхлүүлснээр Монголын хамгийн том алтны үйлдвэрлэгч болох юм. 2025 оноос алтны эхний олборлолтоо хийхээр төлөвлөж байгаа бөгөөд уурхайн ашиглалтын 2 дахь жилээс эхлэн 5 дахь жилийг дуустал жилд дунджаар 87,000 унц алт олборлох төлөвтэй.

Компанийн 2023 оны 3 дугаар улирлын аудитлагдаагүй тайланд тусгагдсанаар нийт 63.1 сая канад долларын хайгуул, үнэлгээний хөрөнгө тусгагдсан. Үүний 87 хувийг Баянхөндий алтны төсөл бүрдүүлж буй бөгөөд тус төслийн бүтээн байгуулалтын “бэлтгэл” ажлуудыг хэрэгжүүлж байна.

Санхүүгийн тайлангийн гол үзүүлэлт болох хайгуул үнэлгээний хөрөнгийн дүн 2010 онд 37.9 сая канад доллар байсан бол 2015 онд хорогдуулалт хийж уг дүн 1.7 саяд хүрч байсан. Түүнчлэн эздийн өмчийн дүн хуримтлагдсан алдагдлын улмаас 2015 онд 2.1 саяд хүрсэн. Түүнчлэн орлогын тайланд тусгагдсан голлох зардлууд болох хайгуул үнэлгээний, ерөнхий удирдлагын зардлууд 2023 оны 3 дугаар улирлын аудитлагдаагүй тайлангаар 0.6 сая орчимд байгаа үзүүлэлттэй байна.

Онцлох хэлцэл

2023 оны 1-р сард Эрдэнэ Ресурс нь Монголиан Майнинг Корпорэйшн (“MMC”)-тэй стратегийн түншлэлийн гэрээ байгуулжээ.

Ямар нөхцөлтэй вэ? MMC нь хэд хэдэн үе шаттайгаар 40 сая ам.долларын хөрөнгө оруулалт хийж, Хөндий, Алтан Нар ашиглалтын тусгай зөвшөөрөл, Улаан хайгуулын тусгай зөвшөөрлийг эзэмшдэг Эрдэнэ Ресурсийн охин компани болох Эрдэнэ Монгол ХХК-ийн 50%-тай тэнцэх хувьцааг эзэмшинэ.

Эрдэнэ Ресурс нь ЭМ-ийн 50%-г эзэмшихээс гадна Хөндий, Алтан Нар, Улаан тусгай зөвшөөрлийн хүрээнд эхний 400,000 унц алтны олборлолтоос давсан олборлолт болон дээрх тусгай зөвшөөрлүүдийн орчимд 5 км-ийн талбайд эзэмших тусгай зөвшөөрлүүдийн хүрээнд 5%-ийн борлуулалтын орлогын төлбөр (Net smelter return) авах хэлцэлтэй байна.

Компани одоогоор ашигтай ажиллаж эхлээгүй байгаа бөгөөд 2023 оны 3 улирлын байдлаар хуримтлагдсан алдагдал 133.8 сая канад доллартой байгаа бөгөөд нийт хөрөнгөтэй харьцуулахад 142%-тай байна.
Компанийн санхүүгийн суурь үзүүлэлт өнгөрсөн хугацааны алдагдлын хэмжээ зэргийг авч үзэхэд хөрөнгө оруулахад эрсдэл тодорхой хэмжээнд өндөртэй хувьцаа гэж дүгнэж болно. Хэрэв компани төлөвлөгөөний дагуу бүтээн байгуулалтаа гүйцэтгэж төлөвлөсөн олборлолтоо хийж чадвал өгөөж мөн эрсдэлээ дагаад өндөр байх боломжтой.