Гадаад зах зээлийн судалгаа №19

Энэ өдрийн мэнд! Өнөөдрийн гадаад зах зээлийн судалгааны 19-р дугаарт “Big Techs”-ийн тайлангаар бэлтгэлээ. Хэрэгтэй нэгэнд нь www.apex.mn сайтыг санал болгож и-мэйлээ бүртгүүлэхийг зөвлөөрэй. Sharing is caring 👏

ТОВЧООР

📈 PAYPAL 2021 оноос хойш хамгийн сайн гүйцэтгэлтэй эхний хагас.
🔮 AMD ирээдүй өнгөлөг байна.
🤔 Microsoft эрэлт байгаа ч борлуулалт бага
💪 Meta Platforms 4 улирал дарааллан шинжээчдийн таамгыг давлаа

ЭХНИЙХ НЬ

📈 PAYPAL 2021 оноос хойш хамгийн сайн гүйцэтгэлтэй эхний хагас.

2024 оны эхний хагас жилийн тайланд Борлуулалтын орлого 9%, нэгж хувьцаанд ногдох ашиг өмнөх оны мөн үеэс 36% өссөн нь шинжээчдийн таамгаас давж хувьцааны ханшийг 10% өсгөлөө.

Нийт идэвхтэй дансны тоо 429 саяд хүрснээр компанийн нийт гүйлгээний төлбөрийн хэмжээ өмнөх оны мөн үеэс 11% өсөж $417B хүрсэн байна. Гүйлгээний ашиг өмнөх оны мөн үеэс 8%-иар өсөж $3.6B долларт хүрж нийт орлогын тал хувийг бүрдүүлсэн бол $1.4B долларын чөлөөт мөнгөн урсгалыг бий болгож $1.5B үнийн дүн бүхий хувьцааг эргүүлэн худалдан авсан байна.

Тэдний ирээдүйн төлөвлөгөө

• PayPal 2024 оны бүтэн жилийн борлуулалт болон ашгийн төсөөллөө нэмэгдүүлсэн

• Тус компани NFC технологийн олон хувилбаруудыг Европт нэвтрүүлэхээр төлөвлөж байгаа

• PayPal нь шинэ бүтээгдэхүүн үйлчилгээг зах зээлд нэвтрүүлэх, инновацад хөрөнгө оруулахад түлхүү анхаарч ажиллана.
  Нэмж хувьцаагаа 6 тэрбум доллароор худалдаж авахаар төлөвлөсөн.
  

ДАРААХ НЬ

🔮Advanced Micro Devices Inc - Ирээдүй ч өнгөлөг байна даа ️🔆

2-р улиралд $5.8 тэрбумын борлуулалт хийж өмнөх оны мөн үеэс 9%-иар өссөн бөгөөд Дата төвийн сегментийн орлого $2.8 тэрбум болж 115%-иар өссөн нь голлох нөлөөг үзүүлжээ. Түүнчлэн компанийн үйл ажиллагааны мөнгөн урсгал $521-593 сая, цэвэр мөнгөн урсгал $379-439 сая болж тус тус нэмэгдсэн сайн үзүүлэлттэй байна.

Компанийн зүгээс 3-р улиралд эерэг төлөв гаргаж, $6.7 орчим тэрбумын орлого олно хэмээн төлөвлөсөн байна. Энэ нь жилийн өмнөхтэй харьцуулахад 16% орчим хувиар өсөх боломжтой үзүүлэлт юм.

ТЭРНИЙ ДАРААХ НЬ

🤔 Microsoft - эрэлт байгаа ч борлуулалт бага

Мягмар гарагт тайлангийн дараа MSFT хувьцааны ханш 7% буурчээ. Хэдийн компанийн санхүүгийн үзүүлэлт шинжээчдийн хүлээлтээс өндөр гарсан ч AI-ийн орлого хөрөнгө оруулагчдын хүсэлд нийцсэнгүй.

Intelligent Cloud буюу ухаалаг үүлэн тооцооллын сегмент нь орлогын чухал хэсгийг бүрдүүлдэг ба өмнөх оны мөн үеэс 19%-иар нэмэгдэн $28.52 тэрбум болсон байна. Гэвч энэхүү сегментэд багтах Azure болон үүнтэй холбоотой үйлчилгээний орлого өмнөх улирлаас 2% буурсан нь хувьцааны ханш унах гол шалтгаан болжээ.

Цаашид, AI эрэлт ихтэй байгаа тул үүнтэй холбоотой дэд бүтцийн салбарт хөрөнгө оруулалт хийхээ мэдэгдсэн ба үүнээс үүдэлтэй зардал нэмэгдэж, үйл ажиллагааны маржин 1%-иар буурах хүлээлттэй байна.

Тэд Azure-ийн борлуулалтын 28-29%-ийн өсөлт үзүүлэх байх хэмээн таамаглаад байна.

Эрэлт ихтэй зах зээлд хөрөнгө оруулалт хийж байгаа ч борлуулалтын тамгыг багаар хүлээж байгаа нь хөрөнгө оруулагчид болон шинжээчдэд сөрөг бодол төрүүлж байна.

СҮҮЛИЙХ НЬ

💪 Meta Platforms 4 улирал дарааллан шинжээчдийн таамгыг давлаа

• Компанийн 2 дугаар улирлын борлуулалтын орлого хүлээлтээс давж, ханш өсөлттэй хаагдав. /сүүлийн 4 улирал дараалан хүлээлтийг даваад байна/

• Хиймэл оюун ухаанд хийсэн хөрөнгө оруулалт үр дүнгээ өгч, Meta Ai хамгийн их хэрэглэгдэж буй AI зөвлөх болно.

• Компанийн үнэлгээ одоо ч өндөр байгаа нь тус хувьцаа эргэлзээтэй хөрөнгө оруулалтын сонголтоор нэрлэгдлээ.

Мета-ийн 2-р улирлын тайланд тусгагдсанаар нэгж хувьцаанд ногдох цэвэр ашгийн хэмжээ (EPS) $5.16 гарч даруй $0.40-өөр хүлээлтийг давав. Түүнчлэн борлуулалтын орлого $39.07 тэрбумд хүрч өмнө оны мөн үеэс 22.1% өсжээ.

Хөрөнгө оруулагчдын дунд том анхаарал хандуулж байсан сэдэв нь компанийн хөрөнгө оруулалтын зардал. Тэгвэл 2023 оны сүүлээс эхлэн судалгаа, хөгжүүлэлтийн зардал бага багаар буурч нийт зардлын 27% эзлэх болсон сайн мэдээтэй байна. Тус хөрөнгө оруулалт ч үр дүнгээ өгч байгаа бололтой. Захирлын зүгээс хоёрдугаар улирлын тайландаа “Энэ ондоо багтаан хамгийн өндөр эрэлт, хэрэглээ бүхий AI зөвлөх болох” тухай дурдсан байна.

Эцэст нь, хөрөнгө оруулалтын оновчтой сонголт мөн үү?
Тэдний бүтээгдэхүүнийг өдөрт дунджаар 3 гаруй тэрбум хүн хэрэглэж байгаа ба өдрөөс өдөрт тоо нь бага багаар нэмэгдсээр байна. Зах зээлд эзлэх байр суурь болон зардлаа удирдаж буй шийдвэрүүд нь урт хугацаанд үр дүнгээ өгөхөөр байгаа юм. Хэдий тийм ч одоогийн ханш болох $474.83 нь олон хүний эргэлзээг төрүүлж буй буюу хэт өндөр гэж үнэлэгдэж байна. Хэрэв та урт хугацаанд хөрөнгө оруулалтын ашгаа харж буй бол уг хувьцааг жагсаалтдаа нэмэхэд буруудахгүй.

АНХААРАЛД!!!

Уг и-мэйл нь мэдээллийн шинж чанартай бөгөөд хөрөнгө оруулалтын эцсийн шийдвэрийг харилцагч өөрөө гаргах бөгөөд аливаа хөрөнгө оруулалт нь тодорхой эрсдэлийг өөртөө агуулж байдаг тул алдагдал хүлээх боломжтой.

Дээрх судалгааг бэлтгэхдээ тухайн цаг үеийн хамгийн сүүлийн үеийн мэдээллүүдийг агуулахыг зорьсон бөгөөд гуравдагч талын мэдээллийн үнэн зөв байдалд 100 хувь баталгаа өгч чадахгүй. Хөрөнгө оруулагч тус бүрийн эрсдэлд хандах байдал өөр тул аливаа шийдвэрийг гаргахдаа нэмэлт судалгаа шинжилгээ, зөвлөмж авахыг харилцагч танд санал болгож байна. Энэхүү судалгаанд дурдсан таамаглалаас үүдэн гарах аливаа эрсдэлийг шинжээч болон компани хариуцахгүй болно.