Гадаад зах зээлийн судалгаа №18

Гадаад арилжааны энэ 7 хоногийн мэйлээр Alphabet, Tesla болон бусад компаниудын улирлын тайланг онцоллоо. Өнөөдрийн дугаарт:

1. 🔎Alphabet - Борлуулалт өссөн ч ханш унав.

2. ⚡Tesla - Робот таксиг зах зээлд гаргах хараахан болоогүй…

3. 🏎️💨General motors - Одоо ч хөрөнгө оруулахад болох хувьцаа.

4. 🖥️General electric - Ханш цаашид ч өсөх боломжтой.

5. 💳Visa - Худалдан авалт буурвал орлогод хүчтэй нөлөөлнө.

6. 📱Verizon - Зах зээлд хямд үнэлэгдэж байна.

Борлуулалт өмнөх оны мөн үеэс 13.6%-иар, цэвэр ашиг 28.6%-иар тус бур өссөн хэдий ч Waymo төслийн санхүүжилт болон зарим зардлууд өсөх хандлагатай байгаа тул хувьцааны ханш арилжааны дараах цагаар 2%-иар буурсан байна.

Борлуулалт шинжээчдийн таамаглалаас 3.91% өндөр гарсан бол нэгж хувьцаанд ногдох ашиг шинжээчдийн таамаглалаас доогуур гарсан нь тайлан гарсан өдрийн арилжаагаар хувьцааны ханш 2.04% унахад нөлөөлөв.

Тэсла компани нь автомотив болон сэргээгдэх цахилгаан эрчим хүч гэсэн үндсэн 2 сегментээс орлого бүрддэг бөгөөд нийт орлогын 90-с дээш хувийг дангаараа бүрдүүлдэг автомашины борлуулалт эрчимтэй нэмэгдсэн нь орлого өсөх томоохон шалтгаан болсон. 2024 оны 8 сард нээлтээ хийх Робот Такси нь 10 сард болж хойшилсонтой холбоотойгоор хувьцааны ханш сүүлийн 7 хоногуудад хөндлөнгийн хөдөлгөөн үзүүлсэн байна.

АНУ-ын дараа борлуулалтын 30 орчим хувийг бүрдүүлдэг БНХАУ-н хувьд дотоодын цахилгаан автомашин үйлдвэрлэгч нарын ширүүн өрсөлдөөн дунд Тэсла-ийн борлуулалт цаашид буурах хандлага ажиглагдаж байгааг хөрөнгө оруулагч нар анхаарах нь зүйтэй юм.

Хувьцааны ханш 4 сарын сүүлээс эхлэн 93% өсөлт үзүүлэн сүүлийн 3 долоо хоногийн хугацаанд завсрын хөдөлгөөн үзүүлж байгаа нь Робот Такси нээлттэй холбоотой дахин өсөлтөд бэлдэж байгаа дүр зураг харагдаж байна. Мөн Элон Маск ирэх 11 сард болох АНУ ерөнхийлөгчийн сонгуульд нэр дэвшиж байгаа Доналд Трампыг дэмжиж буйгаа олон нийтэд мэдэгдсэн. Хэрэв Трамп ерөнхийлөгчийн сонгуульд ялбал Тэсла яах бол?

2-р улиралд тус компани $47.97 тэрбумын борлуулалт хийж өмнөх оны мөн үеэс 7.2%-иар өссөн байна. Борлуулалт, хүү татварын өмнөх ашиг болон цэвэр ашиг бүгд шинжээчдийн таамгийг амархан эвдэж чаджээ.

Мөн компанийн зүгээс 2024 оны бүтэн жилийн хүү татварын өмнөх ашиг, мөнгөн урсгал, цэвэр ашиг зэргийг нэмэгдүүлэн төсөөллийг шинэчилсэн байна. Гэсэн хэдий ч хувьцааны ханш 6.42%-иар буурчээ. Үүнийг шинжээчид Мичиган дахь цахилгаан ачааны машины үйлдвэрийнхээ нээлтийг 2026 оны дунд үе хүртэл зургаан сараар хойшлуулна гэж мэдэгдсэнтэй холбоотой гэж үзжээ.

Хувьцааны ханш унасан хэдий ч бидний зүгээс General Motors компанийг жилийн өмнөөс санал болгож эхэлсэн бөгөөд одоо ч худалдан авахад боломжтой хувьцаа хэмээн санал болгож байна. Одоогийн байдлаар компанийн PE ratio 6 орчим байгаа юм.

Энэ улирлын орлогын ихэнх хувийг бүрдүүлж буй Батлан хамгаалах ба хөдөлгүүрийн технологийн сегментийн ашиг 49% өссөн эрэлт өндөр байгааг харуулж байна. Мөн урт хугацааны үйлчилгээний гэрээ, тоног төхөөрөмжийн захиалга 4%-иар нэмэгдсэн ирээдүйн боломж өөдрөг байгааг илтгэж буй хэрэг юм.

2-р улиралд тус компани өмнөх оны мөн үеэс:

• Борлуулалтын орлого 4%

• Үйл ажиллагааны ашиг 37%

• Нэгж хувьцаанд ногдох ашиг 62%

• Цэвэр мөнгөн урсгал 17% тус тус өсөж маш сайн гүйцэтгэлтэй ажилласан гэдгээ мэдэгдсэн байна.
  

Хувьцааны ханш тайлан гарснаар өдрийн арилжаагаар 5.68% өсөлттэй хаагдсан нь сүүлийн 3 сарын хугацаанд арилжаалагдсан бүсээ дээш сэтлэн гарснаар хувьцааны үнэ цааш үргэлжлүүлэн өсөх боломжтойг харуулж байна.

Компанийн нэгж хувьцаанд ногдох ашиг шинжээчдийн таамаг болох $2.43-г давж 2.51 гарсан боловч борлуулалтын таамаг хүлээлтэд хүрсэнгүй. Гэсэн хэдий ч өмнөх жилийн мөн үетэй харьцуулахад нийт хийгдсэн гүйлгээний дүн 7 хувиар, борлуулалтын орлого нь 10 хувиар тус тус өссөн байгаа юм.

Хувьцааны ханш тайлан гарснаас хойш унасан нь юунаас болов?

Visa хэдий салбартаа томоохон тоглогч хэдий ч цаашид хэрэглэгчдийн худалдан авалт буурах төлөвтэй байгаа нь тус компанийн орлогод шууд сөргөөр нөлөөлөх төлөвтэй байгаа. Үүнээс гадна нийт 16 үнэлгээний дундаж ханш компанийн одоогийн ханш бодит үнэ цэнэ дээрээ ирлээ гэж зааж байгаа юм. Одоогоор шинжээчид уг хувьцааг hold буюу цаашид ажиглах боломжтой гэж үзэж байна.

Интернэт сүлжээ болон холбогдох тоног төхөөрөмжийг зах зээлд нийлүүлдэг Verizon компанийн цэвэр ашиг 4.7 тэрбум гарсан нь өмнөх оны мөн үеэс буурсан үзүүлэлт болж байна. Энэ нь компанийн борлуулалтаас бус хүүгийн зардалтай холбоотой аж.

Борлуулалт хангалттай өсөөгүй нь хэрэглэгчдийн харилцаа холбоо, интернэтэд төлөх төлбөр буурсантай холбоотой байна.

Гэсэн хэдий ч тус компани зах зээлд эзлэх хэмжээгээрээ эхний 3 байранд орох бөгөөд PE харьцаа бусад өрсөлдөгчтэйгөө харьцуулахад бага байна. Шинжээчид хувьцааг $41.6-оор үнэлж байгаа ба зах зээлд хямдаар үнэлэгдэж байна гэж хэлж болно.

АНХААРАЛД!!!

Уг и-мэйл нь мэдээллийн шинж чанартай бөгөөд хөрөнгө оруулалтын эцсийн шийдвэрийг харилцагч өөрөө гаргах бөгөөд аливаа хөрөнгө оруулалт нь тодорхой эрсдэлийг өөртөө агуулж байдаг тул алдагдал хүлээх боломжтой.

Дээрх судалгааг бэлтгэхдээ тухайн цаг үеийн хамгийн сүүлийн үеийн мэдээллүүдийг агуулахыг зорьсон бөгөөд гуравдагч талын мэдээллийн үнэн зөв байдалд 100 хувь баталгаа өгч чадахгүй. Хөрөнгө оруулагч тус бүрийн эрсдэлд хандах байдал өөр тул аливаа шийдвэрийг гаргахдаа нэмэлт судалгаа шинжилгээ, зөвлөмж авахыг харилцагч танд санал болгож байна. Энэхүү судалгаанд дурдсан таамаглалаас үүдэн гарах аливаа эрсдэлийг шинжээч болон компани хариуцахгүй болно.