📱 Гадаад зах зээлийн судалгаа №15

Гадаад зах зээлийн судалгааны 15-р дугаарт Алибаба, pinduoduo зэрэг зах зээлийн аваргуудыг борлуулалтын орлогоороо гүйцсэн JD.com-г онцоллоо. Хэрэгтэй нэгэнд нь www.apex.mn сайтыг санал болгож и-мэйлээ бүртгүүлэхийг зөвлөөрэй. Sharing is caring  👏 

JD нь БНХАУ-д төвтэй компани бөгөөд онлайн худалдаа, логистикийн цогц үйлчилгээг санал болгодог. Дотоодын томоохон тоглогч алибаба-тай ижил салбарт үйл ажиллагаа явуулж буй бөгөөд 2023 оны байдлаар зах зээлийнхээ 16 орчим хувийг эзэлж байна.

🦄 Ижил төстэй үйл ажиллагаа явуулдаг компаниудаас гол ялгарах онцлог нь тэдний логистикийн үйлчилгээ юм. Олон жилийн турш логистикийн эко системд хөрөнгө оруулалт хийсэн бөгөөд одоогоор дрон болон автономит хүргэлтийн машиныг ашиглаж байна.

Санхүүгийн хувьд:

🤯 Сүүлийн 5 жилд компанийн борлуулалтын орлого нэмэгдсээр байгаа бөгөөд Алибабаг борлуулалтаараа гүйцээд байгаа юм. Орлогын эх үүсвэр нь 4-5 үйл ажиллагааны сегментээс бүрдэж байна.

Эрүүл санхүүгийн өсөлт:

Нийт хөрөнгийн 52 хувийг эздийн өмч бүрдүүлж буй бол 48 хувийг өр төлбөрийн санхүүжилт эзэлж байна. Түүнчлэн нэгж хувьцаанд ногдох эздийн өмчийн дүн $20.2 байгаа юм.

👨‍🏫Өөрөөр хэлбэл компанийн хуримтлагдсан ашиг, энгийн хувьцаа болон бусад өөрийн хөрөнгүүдийг нийт хувьцаанд хувааж үзвэл нэг хувьцаанд 20.2 ам.долларын өөрийн хөрөнгө ногдож байна. Уг үнэлгээнд компанийн санхүүгийн тайланд тоогоор тусгагдаагүй брэндинг, өнгөрсөн жилүүдийн туршлага, менежмент зэрэг нь ороогүй юм шүү. Тэгвэл компанийн хувьцаа зах зээл дээр $30.07-оор арилжаалагдаж байна.

Өнгөрсөн 6 жилийн хугацаанд компанийн нийт хөрөнгө жилд дунджаар 19.5 хувиар өссөн бол өр төлбөр 16 хувиар нэмэгдэж иржээ.

Бие жижиг ч…

Салбарт үйл ажиллагаа явуулж буй компаниудтай харьцуулан авч үзвэл нийт орлогын дүнгээр тэргүүлж байна. Мөн PE харьцаа салбарын дунджаас бага байгаа нь эерэг үзүүлэлт юм.

🚩Хэдийгээр өндөр орлого олж буй ч JD.com-ийн цэвэр ашгийн маржин 2.3 хувь буюу харьцангуй бага байна. Тус үзүүлэлт Алибаба-ийн хувьд 8.5%, PDD holdings буюу pinduoduo-ийн хувьд 26.9 хувь байна.

Чөлөөт мөнгөн урсгал нэмэгдсээр

Компанийн сүүлийн 12 сарын чөлөөт мөнгөн урсгалыг авч үзэхэд 2019 оноос хойш хамгийн өндөр түвшинд ирсэн байна. Чөлөөт мөнгөн урсгал нь эерэг бөгөөд өсөлттэй байх нь компанийг санхүүгийн үзүүлэлт сайтай өсөх боломжтой хэмээн харж болох бөгөөд компанийн үнэлгээг гаргахад ашиглагддаг тул хувьцааны ханшид эерэг нөлөөтэй үзүүлэлт юм.

Wall Street-ийн 38 шинжээч хувьцааны дундаж ханшийн таамаглалыг 41.31 гэж өгсөн бөгөөд энэ нь одоогийн ханшнаас 37%-иар өсөх боломжтой гэсэн үзүүлэлт юм. Ирэх жилүүдэд хэрэглэгчдийн худалдан авалтын суваг онлайн суваг руу илүү чиглэж зах зээл өсөх, Хятадын эдийн засаг, ДНБ-ны сэргэлтийн хүлээлт зэрэг хүчин зүйлүүд JD.com компанийн хувьцааг өсөх боломжийг нэмэгдүүлж байна.

АНХААРАЛД!!!

Уг и-мэйл нь мэдээллийн шинж чанартай бөгөөд хөрөнгө оруулалтын эцсийн шийдвэрийг харилцагч өөрөө гаргах бөгөөд аливаа хөрөнгө оруулалт нь тодорхой эрсдэлийг өөртөө агуулж байдаг тул алдагдал хүлээх боломжтой.

Дээрх судалгааг бэлтгэхдээ тухайн цаг үеийн хамгийн сүүлийн үеийн мэдээллүүдийг агуулахыг зорьсон бөгөөд гуравдагч талын мэдээллийн үнэн зөв байдалд 100 хувь баталгаа өгч чадахгүй. Хөрөнгө оруулагч тус бүрийн эрсдэлд хандах байдал өөр тул аливаа шийдвэрийг гаргахдаа нэмэлт судалгаа шинжилгээ, зөвлөмж авахыг харилцагч танд санал болгож байна. Энэхүү судалгаанд дурдсан таамаглалаас үүдэн гарах аливаа эрсдэлийг шинжээч болон компани хариуцахгүй болно.йбй