🛗 Хагас дамжуулагч буюу Semiconductor

Хагас дамжуулагч бол технологийн салбарын хамгийн чухал бүтээгдэхүүний нэг бөгөөд сүүлийн жилүүдэд хиймэл оюун ухааны салбар хөгжихийн хэрээр хагас дамжуулагчийн зах зээл тэсрэлт хийсэн билээ.

Борлуулалт: 2022 оны дэлхийн хагас дамжуулагчийн салбарын борлуулалт $574.1 тэрбум байсан бөгөөд 2023 онд 8.2%-иар буурч $526.8 тэрбумд хүрчээ. 2023 оны эхний хагас жилд хагас дамжуулагчийн борлуулалт удаашралтай байсан хэдий ч сүүлийн хагас жилд эрчимжсэн.

Тухайлбал 2023 оны 4-р улиралд борлуулалт $146 тэрбумд хүрч 2022 оны 4-р улиралтай харьцуулахад 11.6%-иар өссөн байна. Үүний шалтгаан нь их эрэлт, цөөн тооны нийлүүлэгч юм. Иймд салбарын мэргэжилтнүүд 2024 онд борлуулалт 13.1%-иар өснө хэмээн таамаглажээ.

🗺️ Борлуулалтыг бүс нутгаар: 2023 онд зөвхөн Европ 4%-ийн өсөлт үзүүлсэн бол бусад бүс нутаг 2022 онтой харьцуулахад бууралттай гарчээ.

Эргээд AI руу ороход, өнгөрсөн жилээс эхлэн зах зээлд хүчтэй нэвтэрч байна. Amazon, Apple, Meta, Google болон бусад бүх технологийн компаниуд өөрсдийн AI-ийг хөгжүүлж байна.

Statista-ийн зүгээс 2030 он гэхэд AI зах зээлийг 9 дахин тэлнэ хэмээн таамаглал гаргажээ.

2023 онд ухаалаг утас, компьютерын чипийн эрэлт буурах үед AI зах зээлд хүчтэй орж ирснээр AI чипийн эрэлт нэмэгдсэн. 2024 онд Deloitte AI чипийн борлуулалтыг $50 тэрбум буюу нийт чипний борлуулалтын 8.5%-ийг эзэлнэ хэмээн мэдэгдээд байна.

ХААНА ХӨРӨНГӨ ОРУУЛАХ ВЭ?

Аливаа салбарын ETF-д хөрөнгө оруулах нь тухайлсан нэг компанийг сонгохоос илүү эрсдэл багатай байдаг. Хагас дамжуулагч үйлдвэрлэгч компаниудыг багтаасан сангийн нэг бол iShares semiconductor ETF буюу NASDAQ бирж дээр арилжаалагддаг SOXX юм.

Сангийн 54.5 хувийг дараах 10 компани бүрдүүлж буй бөгөөд хамгийн өндөр хувийн жинг NVIDIA бүрдүүлж байна.

Хэдийгээр ETF нь эрсдэл багатай хөрөнгө оруулалтад тооцоогддог ч SOXX дараах хүчин зүйлсийн улмаас салбарын дунджаас өндөр эрсдэлтэйд тооцогдож буй.

• Стандарт хазайлт: Тухайн хувьцаа/сангийн орлого, ханш хэр их хэлбэлзэлтэй болохыг харуулдаг. Тус үзүүлэлт өндөр байх нь зах зээл дээрээ тогтворгүй үйл ажиллагаатай, эрсдэл өндөртэй салбарт багтдаг болохыг илтгэнэ.

• Хувьцааны төвлөрөл: Сангийн эзэмшилд байгаа, хамгийн өндөр хувиар жин эзэлж буй 10 компани нийт багцын 57.5 хувийг бүрдүүлж буй нь тараан байршуулалт муу, эрсдэл өндөр болохыг харуулж байна. Бусад бүх сангийн дундаж төвлөрөл 36.8 хувьтай байгаа юм.

• Эргэц: Санд багтах хувьцааны өөрчлөлт, хэр их хувийг нь шинэ хувьцаагаар сольсон тухай.

• Tracking error нь аливаа хувьцаа/сан зах зээлийн дундажтайгаа харьцуулахад хэдэн хувиар давсан/буурсан өгөөж олсон тухай харуулдаг. Өгөөж нь бусад ETF -н дунджаас хэт өндөр зөрүүтэй байх нь нэг бол сайн эсхүл маш муу үр дүнг авчрах боломжтойг илтгэнэ.

БОЛОМЖ

Шинэ технологи, шинэ зах зээл: Хагас дамжуулагч нь орчин үеийн электроникийн үйл ажиллагаанд хамгийн чухал ач холбогдолтой бөгөөд хиймэл оюун ухаан (AI) болон IOT зэрэг технологийг идэвхжүүлэхэд тусалдаг тул салбарын өсөлтөд эергээр нөлөөлж байна.

Өсөн нэмэгдэж буй зах зээл: Шинэ зах зээлээс гадна компьютер, ухаалаг гар утас гэх мэт бусад цахилгаан хэрэгслийн зах зээл мөн тэлж байна. Тухайлбал компьютер, ухаалаг гар утас борлуулалт 2024 онд 4%-иар өсөх төлөвтэй байгаа ажээ.

ЭРСДЭЛ

Хязгаарлалт: Үүний тод жишээ бол АНУ болон Хятад юм. АНУ-д үйлдвэрлэгдэж буй сүүлийн үеийн чипийг дайны зориулалтаар ашиглах боломжтой хэмээн үзэж Хятад улс руу экспорт хихийг хориглосон. Хоригоос гадна эдгээр 2 улсын хооронд өрнөж буй худалдааны нөлөөгөөр чип үйлдвэрлэгчдийн борлуулалт буурах боломжтой.

Өндрөөр үнэлэгдсэн байх магадлалтай: Хагас дамжуулагч үйлдвэрлэгчид сүүлийн 1 жилийн хугацаанд өндөр өсөлтийг үзүүлсэн бөгөөд P/E ratio зэрэг зарим үнэлгээний харьцаа үзүүлэлтийг харахад хэт өндрөөр үнэлэгдсэн байх магадлалтай.

DISCLAIMER
Уг и-мэйл нь мэдээллийн шинж чанартай бөгөөд хөрөнгө оруулалтын эцсийн шийдвэрийг харилцагч өөрөө гаргах бөгөөд аливаа хөрөнгө оруулалт нь тодорхой эрсдэлийг өөртөө агуулж байдаг тул алдагдал хүлээх боломжтой.
Дээрх судалгааг бэлтгэхдээ тухайн цаг үеийн хамгийн сүүлийн үеийн мэдээллүүдийг агуулахыг зорьсон бөгөөд гуравдагч талын мэдээллийн үнэн зөв байдалд 100 хувь баталгаа өгч чадахгүй. Хөрөнгө оруулагч тус бүрийн эрсдэлд хандах байдал өөр тул аливаа шийдвэрийг гаргахдаа нэмэлт судалгаа шинжилгээ, зөвлөмж авахыг харилцагч танд санал болгож байна.